Бугун Музаффарбек Тўрабоевнинг фаолиятида муҳим кунлардан бири бўлди. Истеъдодли спортчимиз илк бор “Катта дубулға” таснифидаги мусобақада олтин медалга сазовор бўлиб, ўзи учун яна бир чўққини забт этди. Шубҳасиз, ёзда Францияда уни келгуси марра ҳам кутиб турибди. 2 та мусобақадан бери мағлубият нималигини билмай келаётган Матвей Каниковскийни финалда 13 сонияда таслим қилган Тўрабоевга медаль ва эсдалик совринларни Ўзбекистон МОҚ раисининг биринчи ўринбосари Равшан Ирматов ҳамда МОҚ раиси ўринбосари, мамлакат дзюдо федерацияси раҳбари Азизжон Камилов топширишди.

Давлат Бобонов бронза медали учун беллашувда мухлисларни кўп куттирмади. Атиги 16 сонияда кубалик Иван Моралесни мағлубиятга учратиб, терма жамоамиз учун қимматли медални тақдим қилди. Ҳамюртимизнинг келгуси фаолиятида ҳам мана шундай ёрқин ғалабалар кутиб қоламиз. Тақдирлаш маросимида спортчимизга медални МОҚ Бош котиби Ойбек Касимов топширди.

Шаҳрам Аҳадов ва Обидхон Нўмонов биз учун бугунги кун қаҳрамонларига айланишди. -73 кг вазн тоифасида қатнашган ҳар икки дзюдочимиз ғалабага бўлган иштиёқларини муносиб тарзда намойиш этишди. Афсуски, бронза медали учун баҳсда жароҳат олган Обидхон Нўмонов тақдирлаш маросимида иштирок эта олмади. Нўмоновнинг тезроқ соғайиб, янада кучли бўлиб қайтишини тилаб қоламиз. Ғолиб ва совриндорларга медалларни Осиё Олимпия кенгаши вице-президенти Отабек Умаров топширди.