ЎФАнинг ҳисобот-сайлов конгресси бўлиб ўтди
Бугун Миллий футбол марказида Ўзбекистон футбол ассоциациясининг навбатдаги ҳисобот-сайлов конгресси ва 2025 йилнинг футбол лауреатларини тақдирлаш маросими ўтказилди. Унда ташкилотнинг ортда қолган йилдаги фаолияти, амалга оширилган ишлар ва режалари кўриб чиқилиб, 2025 йилнинг энг яхшилари аниқланди.
Тадбирда Спорт вазирлиги, Миллий Олимпия қўмитаси, ЎФА раҳбарияти, соҳа мутахассислари ва ОАВ ходимлари иштирок этишди. Конгрессда Ассоциация сайлов қўмитасининг қарорига мувофиқ, Давлат хавфсизлик хизмати раиси Қурбонов Баҳодир Низомович ЎФА президенти; Ирматов Равшан Сайфиддинович ЎФА биринчи вице-президенти; Аҳмедов Одил Олимжонович ЎФА вице-президенти лавозимига қайта сайлангани маълум қилинди.
Шунингдек, МОҚ Бош котиби Касимов Ойбек Омилович ЎФА Ижроия қўмитаси аъзолигига сайланди. Қолаверса, 2025 йилги ҳисобот тингланиб, турли бўлимларнинг таркиби шакллантирилди.
Конгрессда сўз олган ЎФА президенти B.Qurbonov соҳани рақамлаштириш, коррупциянинг олдини олиш борасида амалга оширилаётган ишлар хусусида гапириб ўтди.
Тадбир якунида ўзбек футболининг 2025 йил лауреатлари тақдирланди.
Йилнинг энг яхши футболчиси: Элдор Шомуродов;
Йилнинг энг яхши аёл футболчиси: Диёра Ҳабибуллаева;
Йилнинг энг яхши ҳаками: Илгиз Танташев;
Йилнинг энг яхши аёл ҳаками: Насибабону Тошмуҳамедова;
Болалар футболи бўйича йилнинг энг яхши мураббийи: Юсуф Эргашев;
Йилнинг энг яхши мураббийи: Тимур Кападзе;
Аёллар олий лигасининг энг яхши футболчиси: Нилуфар Қудратова;
Аёллар футболи бўйича йилнинг энг яхши мураббийи: Владислав Хан;
Йилнинг энг яхши ёш футболчиси: Садриддин Ҳасанов;
Аёллар олий лигаси тўпурари: Диёра Ҳабибуллаева;
Йилнинг энг яхши ҳудудий футбол ассоциацияси: Қорақалпоғистон Республикаси.
