Жиззахда янги қиличбозлик зали ва падел корти фойдаланишга топширилди
Ўзбекистон Республикаси мустақиллигининг 35 йиллиги арафасида жиззахлик ёш спортчилар учун Миллий Олимпия қўмитаси ва унинг ҳомийлари томонидан янги спорт объектлари фойдаланишга топширилди. Шаҳардаги Яккакурашга ихтисослашган спорт мактаби ҳудудида янги қиличбозлик зали, Зарбдор туманида эса падел корти барпо этилди.
Объектларнинг тантанали очилиш маросимида вилоят ҳокими Улуғбек Мустафоев, Спорт вазири Адҳам Икрамов, МОҚ раисининг биринчи ўринбосари Отабек Умаров ва кўп сонли ёшлар иштирок этишди. Расмийлар энг улуғ, энг азиз байрамимиз арафасида топширилаётган ушбу майдонлар келгусида ўзбек спорти учун янги номларни етиштириб беришига хизмат қилишини таъкидлашди.
Қиличбозлик зали 18х36 метр ўлчамга эга. Энергия самарадорлигига алоҳида эътибор қаратилган объект қуёш панеллари билан ҳам жиҳозланган. Бу ечим спорт иншоотининг электр энергиясига бўлган эҳтиёжини муқобил энергия манбалари орқали таъминлашга хизмат қилади ва ёшларга йилнинг ҳар қайси фаслида қулай муҳитда шуғулланиш имкониятини беради. Шунингдек, падел корти ҳам замонавий қоплама билан жиҳозланган бўлиб, узоқ йиллар давомида ёшларнинг ушбу спорт билан шуғулланишлари ва янги иқтидорларни кашф қилишга ёрдам беради.
