Бугун Спорт вазири Адҳам Икрамов ва Ўзбекистон Миллий Олимпия қўмитаси Бош котиби Ойбек Касимов Венгрия ректорлар конференцияси президенти Бела Меркели ҳамда Венгрия спорт илм-фан университети ректори Тамаш Штербенц билан учрашиб, спорт таълими, илмий тадқиқотлар ҳамда мутахассислар тайёрлаш соҳаларидаги ҳамкорлик масалаларини муҳокама қилди.

Мулоқот давомида икки давлат ўртасида спорт илм-фани йўналишида тажриба алмашиш, талабалар ва мутахассислар учун қўшма таълим дастурларини йўлга қўйиш, шунингдек, спорт тиббиёти ва замонавий тайёргарлик методикаларини жорий этиш каби масалаларга алоҳида эътибор қаратилди. Томонлар бундай ҳамкорлик Ўзбекистонда спорт соҳасида илм-фан ва таълимни янада ривожлантиришга, халқаро алоқаларни мустаҳкамлашга хизмат қилишини таъкидладилар.

Учрашув якунида Спорт вазирлиги ва Семмелвеис университети ўртасида ҳамкорлик меморандуми имзоланди.