Bugun Sport vaziri Adham Ikramov va Oʻzbekiston Milliy Olimpiya qoʻmitasi Bosh kotibi Oybek Kasimov Vengriya rektorlar konferensiyasi prezidenti Bela Merkeli hamda Vengriya sport ilm-fan universiteti rektori Tamash Shterbenz bilan uchrashib, sport taʼlimi, ilmiy tadqiqotlar hamda mutaxassislar tayyorlash sohalaridagi hamkorlik masalalarini muhokama qildi.

Muloqot davomida ikki davlat oʻrtasida sport ilm-fani yoʻnalishida tajriba almashish, talabalar va mutaxassislar uchun qoʻshma taʼlim dasturlarini yoʻlga qoʻyish, shuningdek, sport tibbiyoti va zamonaviy tayyorgarlik metodikalarini joriy etish kabi masalalarga alohida eʼtibor qaratildi. Tomonlar bunday hamkorlik Oʻzbekistonda sport sohasida ilm-fan va taʼlimni yanada rivojlantirishga, xalqaro aloqalarni mustahkamlashga xizmat qilishini taʼkidladilar.

Uchrashuv yakunida Sport vazirligi va Semmelweis universiteti oʻrtasida hamkorlik memorandumi imzolandi.