Xalqaro nogironligi boʻlgan shaxslar kuni munosabati bilan tadbir oʻtkazildi
Poytaxtimizdagi “City Mall” savdo markazida 3-dekabr – Xalqaro nogironligi boʻlgan shaxslar kuni munosabati bilan #Biz_Inklyuziv_jamiyatni_yaratamiz shiori ostida tadbir oʻtkazildi. Ijtimoiy himoya milliy agentligi hamda Milliy Paralimpiya qoʻmitasi hamkorligida tashkil etilgan mazkur tadbirda Oʻzbekiston Milliy Olimpiya qoʻmitasi rahbariyati ham ishtirok etib, mazkur yo‘nalishdagi sa’y-harakatlarni qo‘llab-quvvatladi.
Tadbir davomida turli sindromlar yoki nogironlik bilan yashayotgan fuqarolar, ayniqsa, yoshlarni qoʻllab-quvvatlash, ularni jamiyatga faol integratsiya qilishga qaratilgan loyihalar taqdim etildi. Shuningdek, inklyuziv muhitni shakllantirish, imkoniyati cheklangan shaxslarning ijtimoiy hayotdagi ishtirokini kengaytirishga doir tashabbuslar yoritildi.
