Oʻzbek futbolining fidoyi vakili, tajribali mutaxassis, O‘zbekiston futbol assotsiatsiyasi faxriylar kengashi raisi, OʻFA Ijroiya qoʻmitasi va Murabbiylar kengashi a’zosi, Oʻzbekiston Respublikasida xizmat koʻrsatgan yoshlar murabbiysi Toʻlagan Isoqov hayotdan koʻz yumdi. U butun umrini futbolga bagʻishlab, bu yoʻlda oʻzining sadoqati va mehnatsevarligi bilan el hurmatini qozongan edi.

Toʻlagan Isoqov 1949-yil tavallud topgan. “Paxtakor” jamoasi safida uzoq yillar davomida muvaffaqiyatli oʻyin namoyish etgan. Murabbiy sifatida bir necha klublarda ham samarali faoliyat yuritdi. Uning tajribasi va futbolga boʻlgan mehr-muhabbati yosh avlod uchun ibrat boʻlib xizmat qildi.

U soʻnggi yillarda futbol faxriylari kengashiga rahbarlik qilib, yosh futbolchilarning maʼnaviy kamolotiga munosib hissa qoʻshdi.

Oʻzbekiston Milliy Olimpiya qoʻmitasi marhumning oila a’zolari, yaqinlari hamda futbol jamoatchiligiga chuqur ta’ziya bildiradi.