Zamonaviy beshkurashchilarimiz Minsk yig‘iniga jo‘nab ketishdi
Bugun zamonaviy beshkurash bo‘yicha O‘zbekiston terma jamoasi xalqaro o‘quv-mashg‘ulot yig‘inini olib borish uchun Belarus poytaxtiga yo‘l oldi. Ushbu yig‘in oldinda turgan yirik musobaqalar oldidan muhim tayyorgarlik bo‘lib xizmat qiladi.
Ushbu yig‘in davomida sportchilarimiz Belarus va boshqa davlatlardan tashrif buyuradigan zamonaviy beshkurashchilar bilan mashg‘ulot olib borish orqali ulkan tajriba to‘plashlari ko‘zda tutilgan. Shuningdek, yig‘in doirasida sportchilarimiz 25-27 fevral kunlari xalqaro musobaqada ham o‘z omadlarini sinab ko‘rishadi.
Ushbu yig‘in Xanchjou-2022 Osiyo va Parij-2024 Olimpiya o‘yinlariga munosib tayyorgarlik ko‘rish yo‘lida tashkil etilmoqda. Sportchilarimizning Minskdagi mashg‘uloti 3 martgacha davom etadi.
Ayni paytda sportchilarimiz Minsk shahriga yetib borishgan va ertadan dastlabki mashg‘ulotlarni boshlashadi.
